Endurfundir '79 árgangs Öldutúnsskóla

Myndir frá Lindu Rún

2005-11-14T07:04:00.000-08:00

Þessar myndir sendi Linda Rún, góð viðbót við myndasafnið, kærar þakkir.
Endilega sendið inn fleiri velheppnaðar myndir á endurfundir@hotmail.com :)

Myndirnar

2005-11-11T05:29:00.000-08:00

Fyrstu Endurfundir '79 árgangs Öldutúnsskóla lukkuðust með eindæmum vel. Meira en helmingur árgangsins mætti á Kránna á skemmti sér hið besta. Þetta var stórkostlegt kvöld og bera myndirnar þess glöggt merki. Það voru ýmsir sem voru mjög duglegir við myndatökur og eru myndasmiðir hvattir til að senda vel heppnaðar myndir á endurfundir@hotmail.com
Njótið vel og takk fyrir síðast :)

2005-11-11T05:20:00.000-08:00

2005-11-11T05:10:00.000-08:00

2005-11-11T05:04:00.000-08:00

2005-11-11T04:30:00.000-08:00

2005-11-11T04:24:00.000-08:00

2005-11-09T01:33:00.000-08:00

2005-11-08T16:14:00.000-08:00

Á morgun...

2005-11-04T06:12:00.000-08:00

Stemmningin magnast eins og glöggt má sjá. Hinar fornu eikartunnur sem hafa að geyma ljúffengan ReUnion-Lagerinn hafa verið færðar úr dýflissum Kráarinnar og glaðir matreiðslusveinar keppast um að útbúa viðeigandi meðlæti. Það stefnir allt í mikla gleði annað kvöld enda miklir gleðiboltar væntanlegir, enn berast tilkynningar um þátttöku og stefnir í fimmtíu prósent mætingu. Dyr Kráarinnar opna klukkan tuttugu og minnum við á þátttökugjaldið sem greiðist við komu - ISK 1.500.-
Kvöldið á morgun verður okkar og höfum við ærna ástæðu til að skála eftir tíu ára aðskilnað.
Sjáumst hress á Kránni - NUNC EST BIBENDUM!

Skráning og myndir

2005-11-01T08:05:00.000-08:00

Það styttist óðum í gleðina og hafa fjörtíuogfimm skráð þátttöku sína. Það er alls ekki of seint að skrá sig og hvetjum við alla þá sem ætla sér að mæta að senda okkur línu á endurfundir@hotmail.com
Valdi hefur fengið sendar myndir úr hinum ýmsu áttum og verður það afar áhugavert að berja þær augum. Ef þið lumið á góðum myndum þá endilega sendið honum þær á valdimarks@ru.is

Býflugupistill

2005-10-27T15:30:00.000-07:00

Já ég læt ekki á mér standa...enda hef ég ekki tól til þess, svo að hér kemur einn lítill pistill eins og óskað var eftir.

Vá, mér finnst eins og ég hafi ekki verið á sama stað og Hlynur er að lýsa! Við stelpurnar vorum að flýta okkur svo mikið að vera fullorðnar að við byrjuðum að reykja í 8. bekk og duttum í það fyrst um áramótin fyrir fermingu, skemmtilegasta fyllerý ever. Það er eiginlega alveg ótrúlegt hvað hefur ræst úr okkur miðað við hvað við vorum uppteknar af því að vera til vandræða heima fyrir. Held samt að ég hafi verið skást af þeim, mér tókst allavega aldrei að læra að reykja...

Það sem skilur þarna á milli er náttúrulega það að hann Hlynur var í íþróttum. Við vorum sko EKKI í íþróttum. Svona þegar aldurinn færist yfir þá hefði það verið ansi hagstætt....ehhh! Enda er maður nú búinn að reyna ýmislegt til að öðlast íþróttamannslegt útlit án þess að þurfa að stunda íþróttir, svo sem Slendertone Flex magaþjálfunartækið, rafbylgjur, Herbalife, kolvetnalaust fæði...já það hefði nú borgað sig að sparka í tuðru kannski.

En jú auðvitað er þetta falleg minning sem hann Hlynur er að lýsa. Það var ansi mikið stuð á þessum árum. Svei mér þá, ég held samt að ég sé bara farin að gleyma ansi miklu...ég á pottþétt ekki eftir að muna nöfnin á mörgum ykkar! Man samt alveg nöfnin á þeim sem ég var skotin í.....gússí!

Ég var í nemendaráði með Eyva og Hlyn minnir mig og ég sá um sjoppuna. Ekki gaf reksturinn af sér mikinn ágóða þetta árið enda ósjaldan læðst inn í sjoppuna í frímínútum og fengið sér smá sætindi J. Við Eyvi vorum dáldið dugleg í því sko. Hann var alltaf að reyna að sannfæra mig um að það væri allt í lagi að taka eitt enn, það myndi enginn taka eftir því! Ég var því voðalega lítið dansandi á þessum böllum, var aðallega að afgreiða í sjoppunni.

Ég hlakka mjög mikið til að hitta ykkur þann 5. nóvember. Ég vona að sem flestir sjái sér fært að mæta enda veit ég að það verður alveg ógeðslega gaman! Við stelpurnar ætlum að gera eitthvað skemmtilegt í tilefni dagsins, dekra pínulítið við okkur og skála saman. Sjáumst hress og kát!!!

Kær kveðja, Fjóla Býfluga.

Pistill frá Hlyni

2005-10-26T15:14:00.000-07:00

Jæja kæru fyrrum samnemendur. Þá er komið að langþráðum endurfundum og vinahitting. Í tilefni þess langaði mér að rita nokkrar línur um "gömlu" tímana.

Mitt tímatal í Öldtúnskóla einskorðast við unglingadeildina en alltaf hafði maður á tilfinningunni að maður hafi verið frá unga aldri með þessum sama hópi. Ég þakka foreldrum mínum ennþá í dag að hafa tekið sitt hafurtask og flutt búferlum til Hafnarfjarðar, slíkar voru mótttökurnar í nýjum hópi og finnst mér rétt að minnast á það. Samheldnin og viðmótið var eftirtektarvert með eindæmum og er ég þakklátur og stoltur að tilheyra árgangi 79 í Öldutúnskóla.

Þegar ég fyrst frétti af þessu fór maður að leita til baka í huganum af öllu þessu fólki sem maður var samferða á þessum tíma. Sumt fólk hefur maður rekist á í amstri hversdagsins en aðra hefur maður hreinlega ekki séð síðan fyrir um 10 árum! (Þegar maður talar í tveggja stafa tölum, veit maður að aldurinn er að færast yfir) Það er allavega eitt sem svona hittingur kallar fram, maður verður "ungur"... aftur, ekki að maður sé orðinn gamall, þvert á móti, þetta er rétt að byrja gott fólk!

Það fyrsta sem kemur upp í huga manns var allt þetta frelsi og áhyggjuleysi sem einkenndi þessa tíma. Að fólk hafi getað valhoppað um skólann í gulum og fjólubláum gallabuxum segir allt sem segja þarf. Undirritaður rakst einmitt á gulu JEES buxurnar sínar um daginn ásamt mörgum öðrum kómískum flíkum sem sem maður klæddi sig stoltur í fyrir, höhhhmm... rösklega 10 árum síðan! Ekki laust við að nettur hrollur hafi gert vart við sig. Í framhaldi af gömlum tískustraumum fór maður í gamla diskasafnið sitt og ekki fór maður varhluta af minningum tengdum tónlistarstefnum í þá daga. Allt þetta europopp sem maður hlustaði á skólaböllum, partýum (hjá Lind Hilmars aðalega þá) fer með mann til baka í tíma og rúmi. Hljómsveit eins og Prodigy, dúetinn 2 unlimited og fleiri aðrir ágætir listamenn sem gerðu garðinn frægan á þessum tíma. Skólaböllinn fannst mér alltaf frábær og lifa mörg þeirra ennþá sterk í minningunni. Það er í raun ótrúlegt hversu sterkt félagslíf var á þessum tíma og hlakkaði maður alltaf jafn mikið til að spóka sig í diskóljósum og vera í hópi góðra vina. Alltaf var nóg að gera og sat maður aldrei aðgerðalaus og er þetta jú fyrir tíma farsíma og internets. Hvar væru krakkar nú til dags án þessara hluta spyr maður sig. Og svo ekki sé minnst á hinar frægu skíðaferðir sem alltaf voru snilldin ein. Ég held að ég hafi einu sinni sett skíði á mig í þessum ferðalögum en það var algert aukaatriði í þessum ferðum. Samveran með fólkinu var það sem stóð uppúr og flugu margar fleygar setningar þar sem notaðar eru en þann daginn í dag. Matsalurinn í skólanum var auðvitað hjartað í daglegum samskiptum og er ekki laust við að maður gæti örugglega ennþá heyrt öskrin í Atla Má eða hláturinn í Eyva.

Einnig minnist maður fólksins í kringum mann á þessum tíma, þ.e. kennarar og lærimeistarar okkar í Öldutúnsskóla. Slíkt samansafn af góðum kennurum og ekki síst fólki er vart hægt að finna. Þó svo sumir hafi kannski þurft að láta á góðmennsku þessa fólks reyna, þá stendur alltaf upp úr að allt var með góðum hug gert og okkur til framdráttar. Það væri ósanngjarnt að nefna einhvern einn til sögunnar en allt var þetta úrvalsfólk og gæðamenni.

Ég gæti auðveldlega skrifað margar síður um þá góðu tíma sem fylgdi því að vera með öllu þessu frábæra fólki. Ég ætla ekki að hafa þetta mikið lengra en ég vil þakka þeim sem bera veg og vanda af því að gera þessa endurfundi mögulega og vonandi verður þetta komið til að vera reglulega hjá okkur.

Því næst vil ég varpa pennanum á einhverja Býfluguna til að skrifa nokkrar línur á síðuna.

Að lokum vil ég hvetja alla til að mæta með góða skapið og láta ekki sitt eftir liggja í að gera þetta eftirminnilegt.

Hlakka til að sjá ykkur öll!

Bestu kveðjur, Hlynur Guðlaugsson, L-ari

Bakarakveðjur frá Álaborg

2005-10-26T02:45:00.000-07:00

Hæ hæ mig langar til að senda kveðju til allra og megi endurfundirnir vera sem ánægjulegastir en ég er um þessar mundir búsettur í Álaborg og kemst af þeim sökum ekki. Ég er bakari og er að byrja að læra að verða konditor hér úti . Unnusta mín heitir Lilja Rós og er kennari. Við eigum tvö börn, 3 ára strák sem heitir Óliver Baldvin og 6 mánaða stelpu sem heitir Katrín Salka. Mynd fylgir.

Bestu kveðjur og góða skemmtun
Sigurður Elvar Baldvinsson

Bestu kveðjur til allra frá Egegade

2005-10-24T07:28:00.000-07:00

Júlía úr Joðinu sendir sínar bestu kveðjur til allra. Hún býr í Kaupmannahöfn og verður af þeim sökum fjarri teitinni.
Fyrir nokkrum árum hélt Joð-bekkurinn endurfundi heima hjá Steinunni og Júlíu og sendi hún þennan link á myndir frá kvöldinu. Kærar þakkir fyrir það.

Kveðja frá Búdapest

2005-10-23T06:53:00.000-07:00

Stefán Reynisson stundar mastersnám í viðskiptafræði í Kaupmannahöfn en er um þessar mundir staddur í Búdapest sem skiptinemi. Þ.a.l. kemst hann því miður ekki á Endurfundina en sendir sínar bestu kveðjur og þakkir fyrir gott boð. Hann lét fylgja með þessa skemmtilegu mynd af sér, Sóleyju unnustu sinni og Margréti Nótt, fjögurra mánaða dóttur. Til hamingju Stebbi!

Leitið og þið munuð finna...

2005-10-20T13:35:00.000-07:00

Valdi Joðari sér um söfnun ljósmynda og eða teikninga frá grunnskóla- og unglingadeildarárunum fyrir fyrirhugað slæd-sjó á Kránni þann fimmta. Það verður lítið um skipulögð skemmtiatriði og því væri agalega gaman ef slæd-sjóið gæti orðið að veruleika.
Endilega farið vel ofaní skúffur og inní skápa og reynið að finna myndir frá ferðalögum, jólaböllum, bekkjarkvöldum sem og öðrum viðburðum blómaskeiðsins. Ef svo skemmtilega vill til að þið finnið e-ð hafið þá samband við Valda í síma 695 9566 eða með því að senda honum póst á valdimarks@ru.is

Býflugurnar

2005-10-15T08:33:00.000-07:00

Sæl öllsömul! Við stelpurnar (á myndinni) erum orðnar mjög spenntar fyrir reunioninu! Við ætlum að hittast áður í fordrykk. Djöfull held ég að það verði nú gaman! Fórnið öllu og mætið á þennan hitting! Hlakka til að sjá ykkur :o)
Kv. Fjóla.

Einar Þór skrifar um 1979

2005-10-13T03:13:00.000-07:00

Fyrsti gestur bloggsins er hinn knái og væni drengur Einar Þór úr Joðinu. Hann setti saman þennan afar skemmtilega pistil um hið herrans ár 1979. Takk Einar.
Gestabloggarar eru mjög velkomnir, texti sendist a endurfundir@hotmail.com og látið endilega mynd fylgja með.

---

Árið 1979 var nokkuð merkilegt ár í sögu heimsins. Ekki bara vegna þess að við fæddumst það ár, þó svo að ég er ekki í neinu vafa um að mörg okkar munu marka sín spor í sögunni, heldur gerðust margir atburðir sem hjálpuðu til að skapa þá heimsmynd sem við bæði upplifum og lesum um í dag. Í þessum stutta pistli ætla ég aðeins að nefna örfá atburði sem gerðust þetta umrædda ár bæði erlendis og hérlendis.

Erlent

-Jimmy Carter er forseti USA.
-Rússar ráðast inní Afganistan.
-Járnfrúin Margrét Thatcher kosin forsætisráðherra Bretlands.
-Grænland fær heimastjórn hjá Dönum.
-Rauðu khemerarnir undir stjórn Pol Pot flýja Kambódíu eftir Víetnamska innrás.
-Harðstjórinn Idi Amin flýr eftir að Tanzanískir hermenn hertaka Kampala
höfuðborg Úganda.
-Ayatollah Khomeini snýr til baka út útlegð nær völdum í Íran og íslamska
byltingin byrjar.
-Sid Vicious deyr af of stóran skammt af heróíni.
-UNICEF útnefnir árið 1979 alþjóðlegt ár barnsins.
-Móðir Teresa fær friðarverðlaun Nóbels.

Innlent

-Mannfjöldi landsins er 226.724, verðbólgan 45.5% og atvinnuleysi 0.3%
-Ríkisstjórn vinstri flokkanna, þ.e krata og allaballa springur síðla árs.
-Helgarpósturinn hefur göngu sína.
-Reyklausi dagurinn haldinn í fyrsta sinn hér á landi.
-Lögræðisaldurinn lækkaður úr 20 árum í 18.
-Opinber heimsókn varaforseta USA, Walter Mondale.
-Varaforsætisráðherra Kína kemur í opinbera heimsókn.
-Snjófljóð í Þverdalshorni í Esjunni verður tveimur ungum mönnum að bana.
-Bifreiðaeigendur þeyta flautur til að mótmæla bensínhækkunum.

Eins og glöggt auga greinir var fæðingarár okkar nokkuð fréttnæmt en þess ber að nefna að hér eru aðeins taldir upp þeir atburðir sem undirrituðum fannst standa uppúr og er því langt frá því að vera tæmandi. Hvað sem öðru líður þá erum við að eilífu tengd þessu ári böndum sem aldrei verða slitin því þykir mér viðeigandi að flestir láti nú sjá sig á endurfundi þann 5. nóv og skáli með mér og öðrum fyrir árinu 1979 og þeim áhrifum sem það kann hafa á líf okkar allra.

Kv. Einar Þór Jóhannsson J-ari

Bréfin send & Palli Einars

2005-10-08T16:26:00.000-07:00

Síðasta miðvikudag, eða þann 5. október, voru Endurfundabréfin póstlögð (93 talsins) og vonar Endurfundanefnd svo sannarlega að Íslandspóstur komi bréfum til skila næsta mánuðinn.
Tilkynningar um þátttöku berast títt og stefnir allt í mikla gleði á Kránni. Valdimar úr Joðinu hefur hafið bruggun á sérstökum Reunion-Lager og notar til þess aldagamlar eikartunnur sem Kránni áskotnaðist er Sjóminjasafnið í næsta húsi lagði upp laupana hér um daginn.
Það er ánægjulegt að Palli Einars hefur tekið upp bloggerí eftir góða pásu. Hans mjög svo hressa bloggi er því bætt við lista '79 bloggaranna. Palli var frægur fyrir snilldarlegar skopteikningar af samnemendum og kennurum. Ef e-r luma a teikningum eftir Palla frá grunnskólaárunum væri gaman ef þeir gæfu sig fram.

Nýtt blogg

2005-09-14T13:06:00.000-07:00

Gísli Pétur er með flott blogg sem vert er að skoða. Gísli Pétur er orðinn atvinnuleikari og hefur nú þegar unnið sér margt til frægðar og frama. Um árið var hann kosinn fyndnasti maður Íslands og fer um þessar mundir með hlutverk í uppfærslu Þjóðleikhússins á söngleiknum Edit Piaf.

Bloggarar

2005-09-03T06:46:00.000-07:00

Til gamans verður hér til hliðar listi yfir bloggara árgangsins. Fyrstur og sá eini á lista er listamaðurinn fjölhæfi Arngrímur Borgþórsson. Listinn mun vonandi lengjast með lækkandi sól. Arngrímur dvaldi um hríð í Belgíu við listnám og hélt áfram við Listaháskóla Íslands, hvort hann sé útskrifaður þaðan er mér eigi kunnugt en ég hvet fólk að kíkja bloggsíðuna hans, sem er mjög listræn og auðgandi. Ef áhugi er fyrir að birta slóð á bloggsíðu þá endilega látið mig vita með því að senda mér slóðina á endurfundir@hotmail.com eða skrifa hana í Comments.
Rétt er að geta þess að sá sem þetta skrifar og sér um þessa bloggsíðu er Eyvi, fyrrv. formaður Nemendaráðsins. Skipulagning Endurfundanna eru í höndum okkar Valda og allar ábendingur eru vel þegnar.
Bestu kveðjur frá Lundúnum, E

Bréfið

2005-09-03T06:04:00.000-07:00

Bréfið er tilbúið og verður sent öllum '79 árgangnum að morgni 5. október. Samkvæmt þjóðskrá eru nokkrir skráðir erlendis og fá því bréfið sent á gamla heimilisfangið sitt. Hér að neðan er innhald bréfsins, njótið vel.

- - - - - - - - - - - - - -

Mikið vatn er runnið til sjávar síðan Haukur Helgason skólastjóri kvaddi ’79 árgang Öldutúnsskóla vorið 1995.
Tíu ár liðin og því tími til kominn að hittast á ný.
Laugardaginn 5. nóvember kl. 20.00 verður blásið til endurfunda á efri hæð elsta og virtasta öldurhúsi Hafnfirðinga, A. Hansen.

Boðið verður upp á léttar veitingar og mun bar hússins verða opinn þar sem viðstaddir geta orðið sér út um drykkjarföng á sérstöku endurfundatilboði. Svo auðvelt verði að áætla fjölda þátttakenda óskum við eftir að
tilkynnt sé um þátttöku á eftirfarandi netfang: endurfundir@hotmail.com
Þátttökugjald er 1.500 kr. sem greiðist við komu.
Á bloggsíðunni www.endurfundir.blogspot.com er að finna ítarlegri upplýsingar um fyrirhugaðan viðburð þar sem einnig er hægt að skapa eða taka þátt í umræðum varðandi undirbúninginn.

Einnig væru myndir fá grunnskólaárunum vel þegnar fyrir myndasýningu kvöldsins, en hún verður í höndum Valda úr Joðinu. Ef þú lumar á góðum myndum hafðu þá endilega samband við Valda í síma 695 9566 og mun hann sjá um að koma þeim í tölvutækt form.

Vonum svo sannarlega að þú sjáir þér fært að mæta.

Bestu kveðjur,
Endurfundanefnd

Skipulagning hafin

2005-08-21T08:48:00.000-07:00

Það er mikið gleðiefni að skipulagning Endurfunda '79 árgangs Öldutúnskóla sé hafin. Mikið vatn er runnið til sjávar síðan Haukur Helgason skólastjóri kvaddi ’79 árgang Öldutúnsskóla vorið 1995. Tíu ár liðin og því tími til kominn að hittast. Laugardaginn 5. nóvember kl. 20.00 verður blásið til endurfunda á efri hæð elsta og virtasta öldurhúsi Hafnfirðinga, A. Hansen.